Nuttata 'e Natale 

(Salvatore Di Giacomo) (1898)

Dint'a na grotta scura 
dormeno 'e zampugnare:
dormeno, appese a 'e mura,
e ronferno, 'e zampogne 
quase abbuffate ancora)
a ll' úrdema nuvena;
e, ghianca, accumparesce e saglie ncielo,
dint' 'a chiara nuttata, a luna chiena.

Dormeno: a mezanotte
cchíù de n' ora ce manca;
e se sparano botte,
s' appícceno bengala,
e se canta e se sona
pe tutto 'o vicenato...
Ma 'o Bammeniello nun è nato ancora,
e nun s' è apierto ancora 'o Viscuvato.

Fora, doppo magnato,
esce nfucata 'a gente:
ccà d' 'o viento gelato,
p' 'e fierre d' 'a cancella,
trase 'a furia ogne tanto...
E c' 'o viento, e c' 'o friddo,
ncopp' 'a paglia pugnente, a ppare a ppare,
dormeno, stracque e strutte, 'e zampugnare… 

 

Torna Natale 

(Bovio 1928) 

... Torna Natale...
Ggiesù Bammino torna n'ata vota
bene facenno a chi 'o facette male...
comm'a na vota...

E cu nu panariello chino 'e noce
na vecchia saglie 'e ggrade d' 'o spitale...
"Némmero ventequatto... Santacroce... 
ca tenga 'na resibbola facciale"...

(E "Ileru Ilero" 
m' 'a so' sunnata c' 'o scíalletto rosa, 
ca me diceva, T'aggia di' 'na cosa... 
Statte cchiù allero!)

E 'o carcerato 'areto a 'na cancella
guarda luntano, senza guardà niente... 
So' nove juorne ca le vene a mente 
nu vascio scuro cu 'na vícchiatella.

(E "Ileru Ilero"...
sarrà passata na staggiona sana, 
ma c aggia fa' si nun me pare overo 
ca sta luntana?)

-'0 zampugnaro, sunanno 'a nuvena,
nant' 'a Madonna 'Aiuto s'è 'ncantato ...
"Lleru Ilero - ... Madò, tengo 'na pena 
Lleru Ilero - Madò, so' 'nnamurato! "

(E Ammore, Ammore, 
nce avevo miso ll'anema e 'o penziero; 
avevo ditto: Si 'stu suonno è overo, 
torna 'o vapore ... )

Ninno e nennella metteno 'o Bammino 
dint' 'o Presepio, sott' 'a grutticella... 
Nenna nce allumma 'nnante nu cerino,
ninno, redenno, sona 'a ciaramella...

(E dint' 'o scuro
cchiù fforte chella sera me vasaie...
Dimane tuorne? - Torno. - E giura. - Giuro... 
Ma nun turnaie).

Torna Natale...
Ggiesù BammIno torna n'ata vota,
bene facenno a chi 'o facette male
comm'a na vota! 

Natale (Presepio in costruzione) 

(Russo 1928)

Ma che fai? Addò miette stu craparo?
Chillo te leva tutt' 'a visuale!…
S'ha da mettere accanto all'animale!
E leva 'a Iloco chisto zampugnaro!

E addò se schiaffa? - Ma, cretino caro,
che d'è, presepio, o fosse funerale?! 
Comme! Uno appriesso all'ato! '0 castagnaro,
''o scartellato, 'o turco e 'o speziale?

Distribuisci! Fanne una scenetta! 
Nu gruppetto c'almeno fa figura! 
Che significa, llà, chella carretta?

E chella pacchianella dint' 'o sciallo!
Chella! Chella che porta 'a criatura'! ...
M' 'a piazze sott' 'a coda d' 'o cavallo!

 

 

È NATALE! 

 (L. Somma)

 

‘O palpito ‘e mille campane

che sonano p’‘a mezanotte
‘a gioia che da’ st’ammuina
anticipa nu quarantotto.

Aunite, c’‘o sciato ‘e ll’affetto,
ce sta’ tutta quanta ‘a famiglia
è doce a campà stu mumento
ch’astregna sti core, atturciglia.

Miraculo ‘e n’attimo ‘e pace
na sosta pe’ l’anzia e l’affanno
pe’ nuje, ca pasture ‘e presebbio,
avimmo campato nat’anno.

Vurria ca stu tiempo nemico
putesse fermà sti minute,
sti ffacce, sti vvocche, sti mmane.
na voce ch’allucca: Salute!

Chist’uocchie che guardano ‘a cimma
‘e n’albero addò l’abbundanza
sta dint’‘e ggranate d’‘e lluce
ch’appicciano ‘o ffuoco ‘e st’ausanza.

Chist’uocchie ca cercano ‘o bbene
tra mille culure ‘e biancale
stunate e ‘mbriacate p’‘o vino
mo so’ lampe ‘e vita, è Natale!

 

 

NATALE D’ORO

(L. Somma)

 

Nuvole, tanta nuvole, p’‘o cielo,

addo’ na luna avara sta’ durmenno,
cummogliono sta Napule c’‘o velo
‘e na cuperta arricamata argiento.
Pe’ ll’aria ‘o suono doce ‘e na zampogna
pare dicesse «‘O vvi’, stammo a Natale»
cercammo ‘e cancella’ d’‘a mente ‘e guaje
pienze a fa’ bbene, scòrdate d’‘o mmale. 

Fore a’ na chiesia ride nu pezzente
ringrazia a chi l’ha dato mille lire
e tene mente a chi nun ce da’ niente
comme pe’ di’ «Stò cca’,che d’è nun vide?»
Chesta città ch’ha sbalurdito ‘o munno
è sempe bella, è tutta nu splennore
comme a chi dorme e fa’ nu bellu suonno
‘e nu Natale arravugliato d’oro. 

 

 

N’AT’ALBA

 (L. Somma)

 

L’eco luntano
ca chiano se perde
d’‘o suono ‘e nuvena,
ce porta na nota
‘ntunata d’‘a musica 
doce ‘e Natale.

Pe’ ll’aria,
prufumo ‘e Dicembre,
l’addore d’‘e ppigne.

P’‘e vvie,
frasturnate ‘e rummore,
na smania ‘e sereno.

E ll’uocchie
s’aizeno ‘ncielo
cercanno na lampa cchiù nova
ca desse a stu munno
cuncreta certezza,
ca desse a nu suonno,
vacante ‘e speranza,
chiarore ‘e n’at’alba,
n’at’alba ‘e

 

 

PECCHE’ SULO A NATALE?

(L. Somma)

 

‘O suono ‘e na zampogna
na smania ‘e vulè bbene,
N’albero chino ‘e luce
nu desiderio ‘e pace.

Se stenne ‘a mano pure
a n’antico rivale
se sprecano l’augurie,
è ggià, pecch’è Natale.

Sarrà p’‘o clima ‘e festa
che porta ‘a ricurrenza,
‘o core cagna veste
ritrova na cuscienza.

‘Sta vita, pe’ nu juorno
diventa na livella
e ‘a ggente tutt’attuorno
chisà, pare cchiù bella!

Pure n’ommo ‘nfamone
carezza n’animale
nun fà cchiù ‘o fetendone
le pare naturale.

‘O popolo ‘e stu munno,
arravugliato ‘e male,
diventa bbuono ‘nfunno…
Pecchè sulo a Natale?

 

 

24 DICEMBRE 

(L. Somma)

 

E’ nu ricamo ‘o suono ‘e na zampogna
ca vene ‘a miez’’a via, fredda e sulagna,
e dint’a chesta casa chiena ‘e luce,
quanti ccose se stanno appriparanno.

Nannina sta facenno ‘e zeppullelle
‘e cavule e ricotta mentre ‘o nonno
smiccéa scapuzzianno ‘ncopp’‘a seggia
‘o nennillo ca ‘o tira p’’o cazone.

Mammema sta taglianno ‘o capitone.
Papa’ sbarianno attuorno a stu presebbio,
smanea pa’ fa’ appiccia’ na lampadina
senza addunarse ca s’e’ fulminata.

E pe’ tramente ‘o viento tuppettea
‘nfaccia ‘e llastre, io sento dint’’o core
nu tremmulio, nu spànteco, na freva,
n’arteteca me frezzechèa ‘int’’e vvene.

E sfrenneséo, guardanno chistu vico,
me pare d’‘o vedè ammantato ‘e janco
isso,ch’è stato sempe puvieriello,
all’uocchie mieie mo pare nu rignante.

‘A campana d’‘a chiesia d’‘a Cuncordia
mo gia’ se fa’ senti’, sunanno a ffesta,
manca nu quarto d’ora a mezanotte,
sorema guarda fore a’ na fenesta…

«‘O pranzo e’ pronto!» - Nanninella allucca
v’arraccumanno stu giarrone ‘e vino
si non po’ doppo cca’ se fa ‘a cummeddia;
pirciò cercammo ‘e nun ce ‘ntusseca’.

Ninno mo dorme ‘mbraccio a mammarella
dint’’a stanza tutto è silenzio attuorno,
io guardo chesta scena,comm’è bella!
Sta pace ‘int’’a famiglia comm’è doce!

Ma ‘o nonno rompe stu silenzio ‘e ggelo
è ‘o cchiu’ abbasato e dice cose sante:
«È nato ‘o figlio ‘e Ddio, Nostro Signore!»
…E ce facimme ‘a croce tutte quante.

 

 

LL’URDEMA NUVENA

 (L. Somma) 

 

‘E zampugnare
sempe cchiù raramente
se vedono p’‘e vvie
addò ‘a folla pe’ correre
nun tene manco ‘o tiempo
‘e risciatà.

Pe’ ll’aria, ‘nzieme a nu prufumo ‘e pigne,
se spanneno ‘e nnote, letania ‘e Dicembre
‘e na nuvena scurdata…
Quanta suspire vedenno
na sporta ‘e legnasante…

Fore a na chiesia
miez’‘o tanfo d’‘a gente,
esce ‘o coro ‘e n’Ave Mmaria
mentre na mana se stenne…
Natale nun è pe’ tutte quante
na festa, nu mutivo d’alleria,
è quase sempe na malincunia
pe’ chi tene ‘int’‘o core na poesia.

Addò sta cchiù chella canzone antica
ca parlava d’ammore ‘e nu cafone
pe’ na signora, ch’era tutta Napule,
chien’‘e ricchezza, tutta nu splennore.

E mo sti pasturielle,
luntane d’‘a famiglia pe’ nu mese
accummneciano quanno è ‘a Mmaculata
cercanno ‘a carità pe’ na sunata.

Dint’‘e vascie
addò na vota steveno ‘e madonne,
o na figura ‘e Sante, o Giesù Cristo
truneggia grossa ‘na televisione.

Ma che scennite a fà ‘a sti muntagne
d’‘o Mulise, Matese, d’Avellino,
nun v’accurgite c’ogge n’automobbile
nun v’accumpagna comme a nu traino…

Chiagneve ajere nu ciaramellaro,
core ‘e pute, nu travaso ‘e bbene
mentre sunava, comm’a ffunerale,
‘e nnote triste ‘e ll’urdema nuvena…

 

 Mancava nu mese a Natale... 

(L. Somma)

 

Mancava nu mese a Natale...
Filuccio sunnava 'o presebbio,
Assunta penzava a' befana,
Nannina filava e cantava,
attuorno che cuieta ce steva
pareva 'e senti' gia' 'a nuvena...

'Sta ggente mo e' sulo nu cunto
suspesa tra 'o cielo e na terra
ch'ha avuto cchiu' lutto 'e na guerra,
rusarie 'e ferite arapute,
na scossa l'e' stata fatale,
mancava nu mese a Natale...

 

PRESEBBIO

(Bruno Alvino)

‘Na ventina ‘e iuorne primma
chi ‘nce tene già prepara
tutto chello ca ce vo’:
frasche ‘e noci, carta, chiuove,
‘o lignammo, ‘o fierro, ‘o spago…
..’a mugliera murmulea:
“Mò accumencia co ‘o cantiere!”
Ogne sera se fa l’opera
…’e creature dint’’e piedi,
isso allucca: “ Chiammatelleee!”
“ Ma pecché l’he fa pe’ forza ‘
‘stu presebbio tutte l’anne?”
Le risponne spazientuta
‘a maesta ‘a ‘int’’a cucina.
“ Che capisci, tu sei fredda!
…manco fusse milanese…”
E martella, scassa, acconcia,
po’ se ferma pe’ pensà?:
“ Ca ce faccio ‘a scesullella…
..l’osteria ‘a metto llà sotto,
…chisto è ‘o posto d’’a capanna..
…e ‘o laghetto addò ‘o preparo?”
Doppe mette ‘e lampadine,
po’ se ‘o ‘ncarta e se ‘o culora.
Finalmente arriva l’ora
‘e ce mettere ‘e pasture,
è ‘o mumento cchiù importante;
chiama ‘e figlie attuorno a isso,
comme fosse ‘na reliquia
piglia ‘a scatola ‘a int’’o stipo
e accumencia ‘a spiegazione:
“ ‘A Madonna, S. Giuseppe,
chisto è ‘o voie e l’aseniello,
e chist’ate è ‘o cacciatore..
‘o vi’ cca po’ l’acquaiuolo,
‘o ferraro, ‘o pescatore…
..e benino ‘o pecuraro!”
E accussì ad uno ad uno,
comme atture ‘ncoppe ‘a scena
se sistema ogne pastore.
Mo’ ca l’opera è fernuta,
isso ‘a guarda superbioso,
comme attorno a ‘na vrasera,
se ce piazza assieme ‘e figlie…
…’a mugliera ‘a sotto ‘a porta
sta guardanno e ‘o pizzo a rriso..
..isso ‘a chiama:”Viene ‘a ccà,
iammo viene…ca te scarfe pure tu"È NATALE! 

 

 

A Gesù Bambino

(Umberto Saba)

La notte è scesa
e brilla la cometa
che ha segnato il cammino.
Sono davanti a Te, Santo Bambino!

Tu, Re dell’universo,
ci hai insegnato
che tutte le creature sono uguali,
che le distingue solo la bontà,
tesoro immenso,
dato al povero e al ricco.

Gesù, fa’ ch’io sia buono,
che in cuore non abbia che dolcezza.

Fa’ che il tuo dono
s’accresca in me ogni giorno
e intorno lo diffonda,
nel Tuo nome.

 

Il presepe
(Salvatore Quasimodo)

Natale. Guardo il presepe scolpito
dove sono i pastori appena giunti
alla povera stalla di Betlemme.
Anche i Re Magi nelle lunghe vesti
salutano il potente Re del mondo.

Pace nella finzione e nel silenzio
delle figure in legno ed ecco i vecchi
del villaggio e la stalla che risplende
e l'asinello di colore azzurro.

 

‘A MADONNA D’’A NOTTE ‘E NATALE

(Raffaele Pisani)

 

All’intrasatta, int’’a nuttata cupa,
na stella d’oro accumparette ‘n cielo…

“Venite… currite”… alluccava quaccuno…
‘Mparanza ati vvoce , vicine e luntane,
perciavano l’aria: “Currite… guardate
che cielo lucente… miliarde so’ ‘e stelle
ca pittano ’argiento muntagne e vallate…
Currite, cantate, fenuta è ‘a tristezza,
sanato è ‘o dulore e nun ce sta core
ca tene scurore. Chi chiagne, mo chiagne
pecché stu mumento dà gioja e priezza!
Sentite pe’ ll’aria che pace e armunia…
Na pòvera stalla, ‘a pòvera ch’era,
s’è tutta vestuta ‘e rubine e diamante,
‘sta Luce è na Luce cchiù bella d’’o sole
e fa tutt’’e ccose gentile e affatate,
attuorno nisciuna afflezione ce sta,
né tuorte, né nfamie, né cchiù schiavitù,
è tutta na mùseca d’angele e arcangele…
è nnato nu Ninno ca porta sullievo,
riala salvezza, surrise, cunforto
e dà na speranza pure a cchill’ommo
ca troppo ha patuto e nun spera cchiù…
stu Ninno ha vinciuto ogni male, ogni pena,
stu Ninno ha vinciuto ‘o nniro d’’a morte!
Venite… guardate… è nato Gesù… “

Cu ‘a paglia ch’arunaje d’’a mangiatora,
Giuseppe ‘appriparaje na cunnulella,
e c’’o mantiello
tagliato a ddoje mmità
facette nu cuscino e ‘a cupertella.
Che folla steva for’a chella stalla,
e gente ancora n’arrivava, tanta!
Gesù liggeva dint’’e core ‘e ognuno,
‘sta folla ‘a canusceva tutta quanta,
uommene buone, e quante ne vedeva!...
però vedeva pure ‘e malamente,
gente senza cuscienzia e senza Dio,
‘e peggio malandrine,
‘e peggio delinquente.
E ‘o Bammeniello accumminciaje a chiagnere…
Maria s’’o piglia ‘mbraccio, l’accarezza,
‘o cunnuleja, s’’o vasa, le suspira:
- “Ninno mio bello, nun havé’ appaùra,
io sto vicino a tte, cu tte stongh’io,
sempe vicino mamma te starrà,
sempe vicino.”-
Gesù ‘a guardaje
fisso int’a ll’uocchie…
e nun chiagnette cchiù…
facette ‘o pizzo a rrisa… e s’accuitaje…